ਪਟਿਆਲਾ (ਪ੍ਰੈਸ ਕੀ ਤਾਕਤ ਬਿਊਰੋ): ਕੌਮੀ ਖਪਤਕਾਰ ਸੁਰੱਖਿਆ ਦਿਵਸ ਮੌਕੇ ਅੱਜ ਖੁਰਾਕ ਤੇ ਸਿਵਲ ਸਪਲਾਈਜ਼ ਅਤੇ ਖਪਤਕਾਰ ਮਾਮਲੇ ਵਿਭਾਗ ਪਟਿਆਲਾ ਵੱਲੋਂ ਵੈਬੀਨਾਰ ਕਰਵਾਇਆ ਗਿਆ, ਜਿਸ ‘ਚ ਪਟਿਆਲਾ ਦੇ ਵਿਖੇ ਤਾਇਨਾਤ ਨਿਰੀਖਕਾਂ, ਵੱਖ-ਵੱਖ ਡਿਪੂ ਹੋਲਡਰ ਅਤੇ ਖਪਤਕਾਰਾਂ ਨੇ ਭਾਗ ਲਿਆ। ਵੈਬੀਨਾਰ ਦੌਰਾਨ ਐਨ.ਐਫ.ਐਸ. ਏ. ਐਕਟ 2013 ਅਧੀਨ ਜਾਰੀ ਕੀਤੀ ਜਾਂਦੇ ਰਾਸ਼ਨ ਦੀ ਵੰਡ, ਇਕ ਦੇਸ਼ ਇਕ ਕਾਰਡ ਸਕੀਮ, ਸਮਾਰਟ ਰਾਸ਼ਨ ਕਾਰਡ ਸਕੀਮ ਅਤੇ ਰਾਸ਼ਨ ਪੋਰਟੇਵਿਲਿਟੀ ਸਕੀਮ ਬਾਰੇ ਖਪਤਕਾਰਾਂ ਨੂੰ ਜਾਣੂ ਕਰਵਾਇਆ ਗਿਆ ਅਤੇ ਉਨ੍ਹਾਂ ਨੂੰ ਉਨ੍ਹਾਂ ਦੇ ਅਧਿਕਾਰਾਂ ਵਾਰੇ ਜਾਗਰੂਕ ਕੀਤਾ ਗਿਆ।
ਸਹਾਇਕ ਖੁਰਾਕ ਸਪਲਾਈ ਅਫਸਰ ਪਟਿਆਲਾ ਸ਼੍ਰੀ ਗੁਰਜਿੰਦਰ ਸਿੰਘ ਸਿੱਧੂ ਨੇ ਵੈਬੀਨਾਰ ‘ਚ ਖਪਤਕਾਰਾਂ ਨੂੰ ਐਨ.ਐਫ.ਐਸ. ਏ. ਐਕਟ 2013 ਅਧੀਨ ਪੀ.ਐਚ.ਐਚ. ਕਾਰਡ ਧਾਰਕਾਂ ਨੂੰ ਜਾਰੀ ਕੀਤੇ ਜਾਂਦੇ ਛਿਮਾਹੀ ਰਾਸ਼ਨ ਕੋਟੇ ਬਾਰੇ ਜਾਣੂ ਕਰਵਾਇਆ ਅਤੇ ਦੱਸਿਆ ਗਿਆ ਕਿ ਉਹ ਕਣਕ ਦੀ ਵੰਡ ਸਮੇਂ ਈ-ਪੋਸ ਮਸ਼ੀਨ ਤੋਂ ਨਿਕਲੀ ਪਰਚੀ ਡਿਪੂ ਹੋਲਡਰ ਤੋਂ ਲੈਣਾ ਯਕੀਨੀ ਬਣਾਉਣ ਅਤੇ ਪਰਚੀ ਵਿੱਚ ਦਰਜ ਕਣਕ ਦੀ ਮਾਤਰਾ ਅਤੇ ਬਣਦੀ ਰਕਮ ਨੂੰ ਪੜ੍ਹਨ ਉਪਰੰਤ ਹੀ ਪੈਸਿਆਂ ਦਾ ਭੁਗਤਾਨ ਕਰਕੇ ਕਣਕ ਪ੍ਰਾਪਤ ਕਰਨ ਅਤੇ ਉਨ੍ਹਾਂ ਨੂੰ ਇਹ ਵੀ ਦੱਸਿਆ ਗਿਆ ਕਿ ਸਰਕਾਰ ਵੱਲੋਂ ਬਾਰਦਾਨਾਂ ਕਣਕ ਦੇ ਨਾਲ ਮੁਫ਼ਤ ਵਿੱਚ ਸਪਲਾਈ ਕੀਤਾ ਜਾਂਦਾ ਹੈ।
ਵੈਬੀਨਾਰ ਦੌਰਾਨ ਰਾਸ਼ਨ ਪੋਰਟੇਵਿਲਿਟੀ ਸਕੀਮ ਬਾਰੇ ਜਾਣੂ ਕਰਵਾਇਆ ਗਿਆ ਕਿ ਖਪਤਕਾਰ ਆਪਣੀ ਸਹੂਲਤ ਅਨੁਸਾਰ ਬਣਦਾ ਰਾਸ਼ਨ ਕਿਸੇ ਵੀ ਡਿਪੂ ਤੋਂ ਪ੍ਰਾਪਤ ਕਰ ਸਕਦੇ ਹਨ ਅਤੇ ਇਕ ਦੇਸ਼ ਇਕ ਕਾਰਡ ਸਕੀਮ ਬਾਰੇ ਜਾਣੂ ਕਰਵਾਇਆ ਗਿਆ। ਇਸ ਮੌਕੇ ਖਪਤਕਾਰਾਂ ਨੂੰ ਇਹ ਵੀ ਅਪੀਲ ਕੀਤੀ ਗਈ ਕਿ ਉਹ ਦੂਸਰੇ ਖਪਤਕਾਰਾਂ ਨੂੰ ਵੀ ਇਸ ਸਬੰਧੀ ਜਾਣੂ ਕਰਵਾਉਣ ਤਾਂ ਜੋ ਖਪਤਕਾਰਾਂ ਨੂੰ ਰਾਸ਼ਨ ਪ੍ਰਾਪਤ ਕਰਨ ਵਿੱਚ ਕਿਸੇ ਕਿਸਮ ਦੀ ਔਕੜ ਪੇਸ਼ ਨਾ ਆਵੇ ਅਤੇ ਜਨਤਕ ਰਾਸ਼ਨ ਵੰਡ ਪ੍ਰਣਾਲੀ ਵਿੱਚ ਹੋਰ ਪਾਰਦਰਸ਼ਤਾ ਆ ਸਕੇ।
ਕੌਮੀ ਖਪਤਕਾਰ ਸੁਰੱਖਿਆ ਦਿਵਸ ਮੌਕੇ ਖਪਤਕਾਰਾਂ ਨੂੰ ਕੀਤਾ ਜਾਗਰੂਕ ਵੈਬੀਨਾਰ ਦੌਰਾਨ ਐਨ.ਐਫ.ਐਸ.ਏ. ਐਕਟ 2013 ਤਹਿਤ ਮਿਲਣ ਵਾਲੀਆਂ ਸਹੂਲਤ ਸਬੰਧੀ ਦਿੱਤੀ ਜਾਣਕਾਰੀ
