RelatedPosts
ਸਰਕਾਰ ਦੇ ਲੱਖਾਂ ਦਾਅਵਿਆਂ ਦੇ ਬਾਵਜੂਦ ਦੇਸ਼ ਦੀਆਂ ਜ਼ੇਲ੍ਹਾਂ ਵਿੱਚ ਫੈਲੀ ਮਾੜੀ ਵਿਵਸਥਾ ਵਿੱਚ ਕੋਈ ਸੁਧਾਰ ਨਹੀਂ ਹੋ ਰਿਹਾ ਅਤੇ ਇਹਨਾਂ ਜ਼ੇਲ੍ਹਾਂ ਵਿੱਚ ਆਏ ਦਿਨ ਮੋਬਾਇਲ, ਨਸ਼ੀਲੇ ਪਦਾਰਥ ਅਤੇ ਹੋਰ ਬੈਨ ਵਸਤੂਆਂ ਬਰਾਮਦ ਹੋਣ ਦੇ ਨਾਲ-ਨਾਲ ਕੈਦੀਆਂ ਵਿੱਚ ਅਨੁਸ਼ਾਸ਼ਨਹੀਨਤਾ, ਮਾਰਕੁੱਟ ਅਤੇ ਗੁੰਡਾਗਰਦੀ ਲਗਾਤਾਰ ਵਧਦੀ ਹੀ ਜਾ ਰਹੀ ਹੈ। ਪਿਛਲੇ ਸਮੇਂ ਦੌਰਾਨ ਵਾਪਰੀਆਂ ਕੁਝ ਘਟਨਾਵਾਂ ਤੋਂ ਇਹ ਸਪੱਸ਼ਟ ਹੋ ਜਾਂਦਾ ਹੈ।
* 11 ਜੂਨ ਨੂੰ ਹਰਿਦੁਆਰ ਜ਼ਿਲ੍ਹਾ ਜ਼ੇਲ੍ਹ ਵਿੱਚ ਇੰਤਜਾਰ ਉਰਫ ਭੂਰਾ ਪਹਿਲਵਾਨ ਗੈਂਗ ਨੇ ਉਥੇ ਬੰਦ ਅਨੁਜ ਚੌਹਾਨ ਨਾਮਕ ਕੈਦੀ ਤੇ ਹਮਲਾ ਕਰਕੇ ਉਸ ਨਾਲ ਬੁਰੀ ਤਰ੍ਹਾਂ ਕੁੱਟਮਾਰ ਕੀਤੀ।
* 29 ਜੂਨ ਨੂੰ ਤਿਹਾੜ ਜ਼ੇਲ੍ਹ ਦੇ ਅਧਿਕਾਰੀਆਂ ਨੇ ਹਾਈਕੋਰਟ ਨੂੰ ਦੱਸਿਆ ਕਿ ਕੁਝ ਦਿਨ ਪਹਿਲਾਂ ਜ਼ੇਲ੍ਹ ਵਿੱਚ ਅਨੇਕਾਂ ਵਿਦੇਸ਼ੀ ਕੈਦੀਆਂ ਦੇ ਹਿੰਸਕ ਹੋ ਜਾਣ ਕਾਰਨ 10 ਜ਼ੇਲ੍ਹ ਕਰਮਚਾਰੀਆਂ ਸਮੇਤ 25 ਲੋਕ ਫੱਟੜ ਹੋ ਗਏ ਸਨ।
* 29 ਜੂਨ ਨੂੰ ਹੀ ਤਿਹਾੜ ਜ਼ੇਲ੍ਹ ਵਿੱਚ ਜਾਕਿਰ ਨਾਮਕ ਇੱਕ ਵਿਚਾਰ ਅਧੀਨ ਕੈਦੀ ਨੇ ਸਜ਼ਾ ਕੱਟ ਰਹੇ ਮਹਿਤਾਬ ਨਾਮਕ ਕੈਦੀ ਦੀ ਧਾਰਦਾਰ ਹਥਿਆਰ ਨਾਲ ਹੱਤਿਆ ਕਰ ਦਿੱਤੀ।
* 01 ਜੁਲਾਈ ਨੂੰ ਬਠਿੰਡਾ ਜ਼ੇਲ੍ਹ ਵਿੱਚ ਬੰਦ ਬਲਜੀਤ ਰਾਮ ਕੈਦੀ ਤੋਂ ਚੈਕਿੰਗ ਦੌਰਾਨ ਇੱਕ ਮੋਬਾਇਲ ਫੋਨ ਅਤੇ ਇੱਕ ਸਿਮ ਬਰਾਮਦ ਹੋਇਆ।
* 02 ਜੁਲਾਈ ਨੂੰ ਹਾਈ ਸਕਿਊਰਟੀ ਨਾਭਾ ਜ਼ੇਲ੍ਹ ਦੀ ਤਲਾਸ਼ੀ ਦੌਰਾਨ ਬਲਵਿੰਦਰ ਸਿੰਘ, ਗੌਰਵ ਕੁਮਾਰ, ਗੁਰਮੇਲ ਸਿੰਘ, ਜਗਦੇਵ ਸਿੰਘ, ਜਸਵੀਰ ਸਿੰਘ ਅਤੇ ਸਤਵੀਰ ਸਿੰਘ ਨਾਮਕ ਕੈਦੀਆਂ ਕੋਲੋਂ 6 ਮੋਬਾਇਲ ਫੋਨ ਬਰਾਮਦ ਕੀਤੇ ਗਏ।
* 03 ਜੁਲਾਈ ਨੂੰ ਕੇਂਦਰੀ ਜ਼ੇਲ੍ਹ ਪਟਿਆਲਾ ਵਿੱਚ ਕੈਦੀਆਂ ਵੱਲੋਂ ਜਬਰੀ ਵਸੂਲੀ ਦਾ ਮਾਮਲਾ ਸਾਹਮਣੇ ਆਇਆ ਜਦੋਂ ਹਵਾਲਾਤੀ ਨਵਜੋਤ ਸਿੰਘ ਵੱਲੋਂ ਦੂਜੇ ਕੈਦੀਆਂ ਨੂੰ ਪੈਸੇ ਦੇਣ ਤੋਂ ਇਨਕਾਰ ਕਰਨ ਤੇ ਇੱਕ ਦਰਜਨ ਕੈਦੀਆਂ ਨੇ ਹਮਲਾ ਕਰਕੇ ਉਸਨੂੰ ਫੱਟੜ ਕਰ ਦਿੱਤਾ।
* 05 ਜੁਲਾਈ ਨੂੰ ਫਿਰੋਜ਼ਪੁਰ ਜ਼ੇਲ੍ਹ ਵਿੱਚ ਨੱਚ ਰਹੇ ਕੈਦੀਆਂ ਦਾ ਵੀਡੀਓ ਬਣਾ ਕੇ ਇੱਕ ਕੌਮੀ ਨਿਊਜ਼ ਚੈਨਲ ਨੂੰ ਭੇਜਣ ਦੇ ਦੋਸ਼ ਤਹਿਤ ਲੋਕੇਸ਼ ਕੁਮਾਰ ਗੋਦਾਰਾ ਨਾਮਕ ਵਿਚਾਰ ਅਧੀਨ ਕੈਦੀ ਦੇ ਵਿਰੁੱਧ ਕੇਸ ਦਰਜ ਕੀਤਾ ਗਿਆ।
* 06 ਜੁਲਾਈ ਨੂੰ ਸੈਂਟਰਲ ਜ਼ੇਲ੍ਹ ਲੁਧਿਆਣਾ ਵਿੱਚ ਵੱਖ-ਵੱਖ ਗੰਭੀਰ ਦੋਸ਼ਾਂ ਵਿੱਚ ਬੰਦ ਸ਼ੁਭਮ ਅਰੋੜਾ ਦੇ ਕਬਜ਼ੇ ਵਿੱਚੋਂ ਮੋਬਾਇਲ ਬਰਾਮਦ ਹੋਣ ਤੇ ਸ਼ੁਭਮ ਦੇ ਨਾਲ-ਨਾਲ ਜ਼ੇਲ੍ਹ ਅੰਦਰ ਮੋਬਾਇਲ ਲਿਆਉਣ ਵਿੱਚ ਉਸਦੀ ਸਹਾਇਤਾ ਕਰਨ ਦੇ ਦੋਸ਼ ਵਿੱਚ ਜ਼ੇਲ੍ਹ ਦੇ ਸਹਾਇਕ ਸੁਪਰਡੈਂਟ ਕਰਨਵੀਰ ਸਿੰਘ ਅਤੇ ਸ਼ੁਭਮ ਦੇ ਇੱਕ ਸਾਥੀ ਵਿਰੁੱਧ ਕੇਸ ਦਰਜ ਕੀਤਾ ਗਿਆ ਹੈ।
ਉਕਤ ਘਟਨਾਵਾਂ ਗਵਾਹ ਹਨ ਕਿ ਜ਼ੇਲ੍ਹਾਂ ਵਿੱਚ ਕੈਦੀਆਂ ਦੇ ਹੌਂਸਲੇ ਇਸ ਕਦਰ ਵਧ ਚੁੱਕੇ ਹਨ ਅਤੇ ਜ਼ੇਲ੍ਹਾਂ ਇਸ ਕਦਰ ਪ੍ਰਸ਼ਾਸ਼ਨ ਦੇ ਘਟੀਆ ਪ੍ਰਬੰਧ ਦਾ ਸ਼ਿਕਾਰ ਹਨ ਕਿ ਕੈਦੀ ਇਸ ਸਥਿਤੀ ਵਿੱਚ ਕੁਝ ਵੀ ਕਰ ਸਕਦੇ ਹਨ। ਇਹ ਵੀ ਸੱਚਾਈ ਹੈ ਕਿ ਜ਼ੇਲ੍ਹ ਪ੍ਰਸ਼ਾਸ਼ਨ ਵਿੱਚ ਨਿਯੁਕਤ ਕੁਝ ਭ੍ਰਿਸ਼ਟ ਮੁਲਾਜ਼ਮ ਇਹਨਾਂ ਕੈਦੀਆਂ ਦੀ ਸਹਾਇਤਾ ਕਰਨ ਵਿੱਚ ਅੱਗੇ ਰਹਿੰਦੇ ਹਨ ਜਿਸ ਕਾਰਨ ਕਈ ਵਾਰ ਇਹ ਕੈਦੀ ਅਣਸੁਖਾਵੀਆਂ ਘਟਨਾਵਾਂ ਨੂੰ ਵੀ ਅੰਜਾਮ ਦੇ ਜਾਂਦੇ ਹਨ। ਅਜਿਹੇ ਵਿੱਚ ਜਦੋਂ ਤੱਕ ਜ਼ੇਲ੍ਹ ਪ੍ਰਸ਼ਾਸ਼ਨ ਜ਼ੇਲ੍ਹਾਂ ਨੂੰ ਅਸਲ ਵਿੱਚ ਸੁਧਾਰ ਘਰ ਬਣਾਉਣ ਲਈ ਸਖਤ ਕਦਮ ਨਹੀਂ ਚੁੱਕੇਗਾ ਅਤੇ ਕੈਦੀਆਂ ਤੱਕ ਪ੍ਰਤੀਬੰਧ ਵਸਤੂਆਂ ਪਹੁੰਚਾਉਣ ਲਈ ਦੋਸ਼ੀ ਜ਼ੇਲ੍ਹ ਕਰਮਚਾਰੀਆਂ ਵਿਰੁੱਧ ਸਖਤ ਕਾਰਵਾਈ ਨਹੀਂ ਕਰੇਗਾ ਉਦੋਂ ਤੱਕ ਜ਼ੇਲ੍ਹਾਂ ਵਿੱਚ ਵਿਵਸਥਾ ਦਾ ਸੁਧਾਰ ਹੋਣਾ ਅਤੇ ਕੈਦੀਆਂ ਵਿੱਚ ਸੁਧਾਰ ਕਰ ਪਾਉਣਾ ਅਸੰਭਵ ਹੈ।
