* ‘ਆਪ’ ਦੀ ਹਨੇਰੀ ‘ਚ ਉਡਿਆ ‘ਕਮਲ’ * ਇਸ ਵਾਰ ਵੀ ਖਾਤਾ ਨਾ ਖੋਲ੍ਹ ਸਕੀ ਕਾਂਗਰਸ-63 ਉਮੀਦਵਾਰਾਂ ਦੀਆਂ ਜ਼ਮਾਨਤਾਂ ਜ਼ਬਤ
ਨਵੀਂ ਦਿੱਲੀ, 11 ਫਰਵਰੀ (ਪੈ੍ਰਸ ਕੀ ਤਾਕਤ ਬਿਊਰੋ) : -ਆਮ ਆਦਮੀ ਪਾਰਟੀ ਦੇ ‘ਲਗੇ ਰਹੋ ਕੇਜਰੀਵਾਲ’ ‘ਤੇ ਦਿੱਲੀ ਦੇ ਵੋਟਰਾਂ ਨੇ ਇਕ ਵਾਰ ਫਿਰ ਆਪਣੀ ‘ਮੁਹਰ’ ਲਗਾ ਕੇ ਦਿੱਲੀ ਦੀ ਕਮਾਨ ਅਰਵਿੰਦ ਕੇਜਰੀਵਾਲ ਦੇ ਸਪੁਰਦ ਕਰ ਦਿੱਤੀ । ਜਿੱਤ ਯਕੀਨੀ ਹੋਣ ਤੋਂ ਬਾਅਦ ਦੁਪਹਿਰ ਸਾਢੇ ਤਿੰਨ ਵਜੇ ਕੇਜਰੀਵਾਲ ਨੇ ਇਸ ਜਿੱਤ ਨੂੰ ‘ਨਵੀਂ ਕਿਸਮ ਦੀ ਸਿਆਸਤ’ ਕਰਾਰ ਦਿੰਦਿਆਂ ਕਿਹਾ ਕਿ ਇਹ ਦੇਸ਼ ਲਈ ਸ਼ੁੱਭ ਸੁਨੇਹਾ ਹੈ, ਜਦਕਿ ਦਿੱਲੀ ਦੇ ਇੰਚਾਰਜ ਗੋਪਾਲ ਰਾਇ ਨੇ ਦੇਸ਼ ਲਈ ‘ਸ਼ੁੱਭ ਸੁਨੇਹੇ’ ਨੂੰ ਹੋਰ ਤਫ਼ਸੀਲ ਨਾਲ ਬਿਆਨ ਕਰਦਿਆਂ ਕਿਹਾ ਕਿ ਇਹ ਜਿੱਤ ਸਿਰਫ਼ ਦਿੱਲੀ ਤੱਕ ਹੀ ਸੀਮਤ ਨਹੀਂ ਹੈ ਇਸ ਨਾਲ ਆਮ ਆਦਮੀ ਪਾਰਟੀ ਦੀ ਰਾਸ਼ਟਰੀ ਪੱਧਰ ਦੀ ‘ਭੂਮਿਕਾ’ ਇਕ ਵਾਰ ਫਿਰ ਚਰਚਾ ‘ਚ ਆ ਗਈ ਹੈ।
ਦਿੱਲੀ ਵਿਧਾਨ ਸਭਾ ਚੋਣਾਂ ‘ਚ ਆਮ ਆਦਮੀ ਪਾਰਟੀ ਨੇ ਇਕ ਵਾਰ ਮੁੜ 2015 ਦੀ ‘ਆਪ’ ਲਹਿਰ ਨੂੰ ਦੁਹਰਾਉਂਦਿਆਂ 70 ਸੀਟਾਂ ‘ਚੋਂ 62 ਸੀਟਾਂ ‘ਤੇ ਕਬਜ਼ਾ ਕੀਤਾ ਜਦਕਿ ਭਾਜਪਾ ਨੂੰ ਮਹਿਜ਼ 8 ਸੀਟਾਂ ਹੀ ਮਿਲ ਸਕੀਆਂ। ‘ਆਪ’ ਦੀ ਸੁਨਾਮੀ ਨੇ ਭਾਜਪਾ ਦੀ 22 ਸਾਲਾਂ ਦੀ ਸੱਤਾ ਵਾਪਸੀ ਦੀ ਤਾਂਘ ਨੂੰ 5 ਸਾਲ ਲਈ ਅੱਗੇ ਪਾ ਦਿੱਤਾ, ਜਦਕਿ ਆਪਣੀਆਂ ਜੜ੍ਹਾਂ ਤਲਾਸ਼ ਰਹੀ ਕਾਂਗਰਸ ਮੁੜ ਆਪਣਾ ਖਾਤਾ ਖੋਲ੍ਹਣ ‘ਚ ਨਾਕਾਮ ਹੀ ਰਹੀ ਤੇ ਉਸ ਦਾ ਵੋਟ ਸ਼ੇਅਰ ਵੀ ਘਟ ਕੇ 4 ਫ਼ੀਸਦੀ ਤੱਕ ਪਹੁੰਚ ਗਿਆ ਹੈ ਜੋ ਦਰਸਾ ਰਿਹਾ ਹੈ ਕਿ ਸਭ ਤੋਂ ਪੁਰਾਣੀ ਰਵਾਇਤੀ ਪਾਰਟੀ ਤੋਂ ਵੋਟਰ ਬੇਮੁਖ ਹੁੰਦੇ ਜਾ ਰਹੇ ਹਨ। ਭਾਜਪਾ ਤੇ ਕਾਂਗਰਸ ਨੇ ਆਪੋ ਆਪਣੇ ਢੰਗ ਨਾਲ ਚੋਣਾਂ ‘ਚ ਹੋਈ ਹਾਰ ਨੂੰ ਤਾਂ ਸਵੀਕਾਰ ਕੀਤਾ ਪਰ ਨਾਲ ਹੀ ਇਕ ਦੂਜੇ ਨੂੰ ਨਿਸ਼ਾਨਾ ਬਣਾਉਣ ਤੋਂ ਵੀ ਗੁਰੇਜ਼ ਨਹੀਂ ਕੀਤਾ। ਕਾਂਗਰਸ ਨੇ ਆਪਣੀ ਹਾਰ ਨਾਲ ਭਾਜਪਾ ਨੂੰ ਮਿਲੀਆਂ ਸਿਰਫ਼ 8 ਸੀਟਾਂ ‘ਤੇ ਟਿੱਪਣੀ ਕਰਦਿਆਂ ਕਿਹਾ ਕਿ ਦਿੱਲੀ ਦੀ ਜਨਤਾ ਨੇ ਇਹ ਦਿਖਾ ਦਿੱਤਾ ਹੈ ਕਿ ਉਹ ਕਦੇ ਵੀ ਫ਼ਿਰਕੂ ਤਾਕਤਾਂ ਨਾਲ ਖੜ੍ਹੀ ਨਹੀਂ ਹੋ ਸਕਦੀ। ਦੂਜੇ ਪਾਸੇ ਭਾਜਪਾ ਨੇ ਕੇਜਰੀਵਾਲ ਵਲੋਂ ‘ਨਵੇਂ ਯੁੱਗ ਦੀ ਸਿਆਸਤ’ ਦੀ ਤਰਜ ‘ਤੇ ਦਿੱਲੀ ‘ਚ ‘ਦੋ ਧਿਰੀ’ ਮੁਕਾਬਲੇ ਦਾ ਯੁੱਗ ਸ਼ੁਰੂ ਹੋਣ ਦਾ ਐਲਾਨ ਕੀਤਾ।
ਦਿੱਲੀ ਪ੍ਰਦੇਸ਼ ਕਾਂਗਰਸ ਦੇ ਦਫ਼ਤਰ ‘ਚ ਪਸਰੀ ਚੁੱਪ
ਆਈ. ਟੀ. ਓ. ਨੇੜੇ ਸਥਿਤ ਦਿੱਲੀ ਪ੍ਰਦੇਸ਼ ਕਾਂਗਰਸ ਦੇ ਦਫ਼ਤਰ ‘ਚ ਸਵੇਰ ਤੋਂ ਹੀ ਚੁੱਪ ਪਸਰੀ ਹੋਈ ਸੀ। ਆਮ ਆਦਮੀ ਪਾਰਟੀ ਦੇ ਦਫ਼ਤਰ ਤੋਂ ਮਸਾਂ 500 ਮੀਟਰ ਦੀ ਦੂਰੀ ‘ਤੇ ਸਥਿਤ ਦਿੱਲੀ ਪ੍ਰਦੇਸ਼ ਦਫ਼ਤਰ ‘ਚ ਕੋਈ ਰਾਸ਼ਟਰੀ ਜਾਂ ਸਥਾਨਕ ਆਗੂ ਨਜ਼ਰ ਆਉਣਾ ਤਾਂ ਦੂਰ ਕੋਈ ਕਾਰਕੁੰਨ ਵੀ ਨਜ਼ਰ ਨਹੀਂ ਆ ਰਿਹਾ ਸੀ। ਇੱਥੋਂ ਤੱਕ ਕਿ ਕਾਂਗਰਸ ਵਲੋਂ ਹਾਰ ਨੂੰ ਸਵੀਕਾਰ ਕਰਨ ਲਈ ਪ੍ਰੈੱਸ ਕਾਨਫ਼ਰੰਸ ਵੀ ਪਾਰਟੀ ਦੇ ਮੁੱਖ ਦਫ਼ਤਰ ‘ਚ ਹੀ ਕੀਤੀ ਗਈ। 2015 ਤੋਂ 5 ਸਾਲਾਂ ਬਾਅਦ ਵੀ ਕਾਂਗਰਸ ਦਾ ਸਫ਼ਰ ਸਿਫ਼ਰ ਤੋਂ ਸਿਫ਼ਰ ਤੱਕ ਦਾ ਹੀ ਰਿਹਾ। ਪਿਛਲੀਆਂ ਵਿਧਾਨ ਸਭਾ ਚੋਣਾਂ ਵਾਂਗ ਇਸ ਵਾਰ ਵੀ ਆਪਣਾ ਖਾਤਾ ਖੋਲ੍ਹਣ ‘ਚ ਨਾਕਾਮ ਰਹੀ ਕਾਂਗਰਸ ਦੇ ਵੋਟ ਫ਼ੀਸਦੀ ‘ਚ ਵੀ ਭਾਰੀ ਗਿਰਾਵਟ ਆਈ । 2015 ਦੀਆਂ ਵਿਧਾਨ ਸਭਾ ਚੋਣਾਂ 10 ਫ਼ੀਸਦੀ ਵੋਟ ਫ਼ੀਸਦੀ ਹਾਸਲ ਕਰਨ ਵਾਲੀ ਕਾਂਗਰਸ ਹੁਣ ਸਿਰਫ਼ 4 ਫ਼ੀਸਦੀ ਵੋਟ ਫ਼ੀਸਦੀ ‘ਤੇ ਹੀ ਸਿਮਟ ਕੇ ਰਹਿ ਗਈ। ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਰਾਹੁਲ ਗਾਂਧੀ ਅਤੇ ਜਨਰਲ ਸਕੱਤਰ ਪ੍ਰਿਅੰਕਾ ਗਾਂਧੀ ਪ੍ਰਚਾਰ ਦੇ ਆਖ਼ਰੀ 3 ਦਿਨਾਂ ‘ਚ ਹੀ ਸਰਗਰਮ ਨਜ਼ਰ ਆਏ। ਕਾਂਗਰਸ ਦੀ ਅੰਤ੍ਰਿਮ ਪ੍ਰਧਾਨ ਸੋਨੀਆ ਗਾਂਧੀ ਸਿਹਤ ਕਾਰਨਾਂ ਕਰਕੇ ਕਿਸੇ ਵੀ ਰੈਲੀ ‘ਚ ਸ਼ਾਮਿਲ ਨਹੀਂ ਹੋਏ। ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਵੀ ਆਪਣੇ ਤੈਅ ਪ੍ਰਚਾਰ ਪ੍ਰੋਗਰਾਮ ‘ਚੋਂ ਅੱਧ-ਪਚੱਧੇ ਪ੍ਰੋਗਰਾਮਾਂ ‘ਚ ਹੀ ਹਿੱਸਾ ਲਿਆ।
22 ਸਾਲਾਂ ਬਾਅਦ ਵੀ ਭਾਜਪਾ ਦੀਆਂ ਉਮੀਦਾਂ ਨੂੰ ਨਹੀਂ ਪਿਆ ਬੂਰ
ਪਿਛਲੇ 22 ਸਾਲਾਂ ਤੋਂ ਦਿੱਲੀ ਦੀ ਸੱਤਾ ‘ਤੇ ਕਾਬਜ਼ ਹੋਣ ਲਈ ਜੱਦੋ-ਜਹਿਦ ਕਰ ਰਹੀ ਭਾਜਪਾ ਦੀਆਂ ਉਮੀਦਾਂ ਨੂੰ ਇਸ ਵਾਰੀ ਵੀ ਬੂਰ ਨਹੀਂ ਪਿਆ। ਹਾਲਾਂਕਿ ‘ਵੱਕਾਰ’ ਦਾ ਸਵਾਲ ਬਣਾ ਕੇ ਲੜੀਆਂ ਗਈਆਂ ਦਿੱਲੀ ਚੋਣਾਂ ‘ਚ ਭਾਜਪਾ ਦੇ ਕੌਮੀ ਪ੍ਰਧਾਨ ਜੇ. ਪੀ. ਨੱਢਾ ਤੇ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦੀ ਅਗਵਾਈ ‘ਚ ਭਾਜਪਾ ਨੇ ਆਪਣੀ ਪੂਰੀ ਤਾਕਤ ਝੋਕ ਦਿੱਤੀ ਸੀ ਪਰ ਨਤੀਜੇ ਉਸ ਦੀਆਂ ਉਮੀਦਾਂ ਮੁਤਾਬਿਕ ਨਹੀਂ ਆ ਸਕੇ ਅਤੇ ਭਾਜਪਾ ਮਹਿਜ਼ 8 ਸੀਟਾਂ ‘ਤੇ ਹੀ ਸਿਮਟ ਕੇ ਰਹਿ ਗਈ। ਸਾਲ 2015 ਦੇ ਮੁਕਾਬਲੇ ਭਾਜਪਾ ਇਸ ਚੋਣਾਂ ‘ਚ ਆਪਣੀਆਂ ਸੀਟਾਂ ਤੇ ਵੋਟ ਫ਼ੀਸਦੀ ਵਿਚ ਵਾਧਾ ਕਰਨ ‘ਚ ਕਾਮਯਾਬ ਰਹੀ ਹੈ, ਹਾਲਾਂਕਿ 2019 ਲੋਕ ਸਭਾ ਚੋਣਾਂ ‘ਚ ਦਿੱਲੀ ‘ਚ ਭਾਜਪਾ ਨੂੰ ਪ੍ਰਾਪਤ ਵੋਟ ਫ਼ੀਸਦੀ ਦੇ ਮੁਕਾਬਲੇ ਇਹ ਕਾਫ਼ੀ ਘੱਟ ਹੈ। ਸਾਲ 2015 ਦੀਆਂ ਚੋਣਾਂ ‘ਚ ਭਾਜਪਾ ਨੂੰ 32 ਫ਼ੀਸਦੀ ਵੋਟਾਂ ਮਿਲੀਆਂ ਸਨ। ਉਸ ਦੇ ਮੁਕਾਬਲੇ ਇਸ ਵਾਰ ਭਾਜਪਾ ਦਾ ਵੋਟ ਫ਼ੀਸਦੀ ਵੱਧ ਕੇ 38 ਫ਼ੀਸਦੀ ਦੇ ਕਰੀਬ ਪੁੱਜ ਗਿਆ ਅਤੇ ਪਿਛਲੀ ਵਾਰ ਦੀਆਂ 3 ਸੀਟਾਂ ਦੇ ਮੁਕਾਬਲੇ ਇਸ ਵਾਰ ਭਾਜਪਾ ਦੀਆਂ ਸੀਟਾਂ ਵੱਧ ਕੇ 8 ਹੋ ਗਈਆਂ ਹਨ।
