ਆਲੀਆ ਤੇ ਰਣਬੀਰ ਨੇ ਧੀ ਰਾਹਾ ਦਾ ਪਹਿਲਾ ਜਨਮ ਦਿਨ ਮਨਾਇਆ

ਆਲੀਆ ਭੱਟ ਅਤੇ ਰਣਬੀਰ ਕਪੂਰ ਨੇ ਅੱਜ ਆਪਣੀ ਧੀ ਰਾਹਾ ਦਾ ਪਹਿਲਾ ਜਨਮ ਦਿਨ ਮਨਾਇਆ। ਇਸ ਵਿਸ਼ੇਸ਼ ਦਿਨ ’ਤੇ ਰਾਹਾ ਦੀ ਦਾਦੀ ਨੀਤੂ ਕਪੂਰ ਅਤੇ ਸੋਨੀ ਰਾਜ਼ਦਾਨ ਨੇ ਨੰਨ੍ਹੀ ਪਰੀ ਨੂੰ ਸ਼ੁਭਕਾਮਨਾਵਾਂ ਅਤੇ ਪਿਆਰ ਦਿੱਤਾ। ਰਾਹਾ ਕਪੂਰ ਅੱਜ 6 ਨਵੰਬਰ ਨੂੰ ਇੱਕ ਸਾਲ ਦੀ ਹੋ ਗਈ ਹੈ। ਪਰਿਵਾਰ ਨੇ ਉਸ ਨੂੰ ਪਿਆਰ ਭਰੀਆਂ ਸ਼ੁਭਕਾਮਨਾਵਾਂ ਭੇਜੀਆਂ ਹਨ। ਨੀਤੂ ਕਪੂਰ ਨੇ ਇੰਸਟਾਗ੍ਰਾਮ ’ਤੇ ਉਸ ਨੂੰ ਦਿਲੀ ਪਿਆਰ ਦਿੱਤਾ। ਉਨ੍ਹਾਂ ਲਿਖਿਆ, ‘‘ਇਸੇ ਤਰ੍ਹਾਂ ਇਹ ਇੱਕ ਸਾਲ ਦੀ ਹੋ ਗਈ। ਪਹਿਲੇ ਜਨਮ ਦਿਨ ਦੀਆਂ ਵਧਾਈਆਂ ਮੇਰੀ ਪਿਆਰੀ ਡੌਲ ਰਾਹਾ। ਅਸੀਂ ਤੈਨੂੰ ਹਮੇਸ਼ਾ ਪਿਆਰ ਕਰਦੇ ਰਹਾਂਗੇ।’’ ਸੋਨੀ ਰਾਜ਼ਦਾਨ ਨੇ ਵੀ ਰਾਹਾ ਕਪੂਰ ਨੂੰ ਪਿਆਰ ਭਰੀਆਂ ਸ਼ੁਭਕਾਮਨਾਵਾਂ ਭੇਜੀਆਂ ਹਨ। ਉਨ੍ਹਾਂ ਇੰਸਟਾਗ੍ਰਾਮ ’ਤੇ ਲਿਖਿਆ, ‘‘ਇੰਜ ਲੱਗਦੈ ਜਿਵੇਂ ਕੱਲ੍ਹ ਹੀ ਤੂੰ ਸਾਡੀ ਦੁਨੀਆਂ ਵਿੱਚ ਆਈ। ਵਿਸ਼ਵਾਸ ਨਹੀਂ ਹੋ ਰਿਹਾ ਹੈ ਕਿ ਪੂਰਾ ਇੱਕ ਸਾਲ ਹੋ ਗਿਆ। ਹੈਪੀ ਬਾ’ਡੇ ਮੇਰੀ ਨੰਨ੍ਹੀ ਰਾਹਾ।’’ ਆਲੀਆ ਅਤੇ ਰਣਬੀਰ ਪਿਛਲੇ ਸਾਲ 14 ਅਪਰੈਲ ਨੂੰ ਵਿਆਹ ਦੇ ਬੰਧਨ ਵਿੱਚ ਬੱਝ ਗਏ ਸਨ ਅਤੇ ਉਨ੍ਹਾਂ ਦੇ ਘਰ 6 ਨਵੰਬਰ ਨੂੰ ਧੀ ਨੇ ਜਨਮ ਲਿਆ ਸੀ।