ਟੀ-20 ਲੜੀ ਜਿੱਤਣ ਦੇ ਇਰਾਦੇ ਨਾਲ ਉਤਰੇਗੀ ਭਾਰਤੀ ਟੀਮ

ਕਾਰਡਿਫ – ਪਹਿਲੇ ਟੀ-20 ਵਿੱਚ ਸ਼ਾਨਦਾਰ ਜਿੱਤ ਦਰਜ ਕਰਨ ਵਾਲੀ ਭਾਰਤੀ ਟੀਮ ਭਲਕੇ ਇਥੇ ਖੇਡੇ ਜਾਣ ਵਾਲੇ ਦੂਜੇ ਟੀ-20 ਕੌਮਾਂਤਰੀ ਕ੍ਰਿਕਟ ਮੈਚ ਵਿੱਚ ਫ਼ਿਰਕੀ ਤੋਂ ਖ਼ੌਫ਼ਜ਼ਦਾ ਇੰਗਲੈਂਡ ਨੂੰ ਹਰਾ ਕੇ ਲੜੀ ਆਪਣੇ ਨਾਂ ਕਰਨ ਦੇ ਇਰਾਦੇ ਨਾਲ ਉਤਰੇਗੀ। ਪਹਿਲੇ ਮੈਚ ਵਿੱਚ ਕੁਲਦੀਪ ਯਾਦਵ ਨੇ 24 ਦੌੜਾਂ ਬਦਲੇ ਪੰਜ ਵਿਕਟ ਲਏ ਜਦੋਂਕਿ ਕੇ.ਐਲ.ਰਾਹੁਲ ਨੇ ਨਾਬਾਦ ਸੈਂਕੜਾ ਜੜਿਆ। ਭਾਰਤ ਨੇ ਬਿਹਤਰੀਨ ਹਰਫ਼ਨਮੌਲਾ ਖੇਡ ਦਾ ਪ੍ਰਦਰਸ਼ਨ ਕਰਦਿਆਂ ਮੇਜ਼ਬਾਨ ਟੀਮ ਨੂੰ ਅੱਠ ਵਿਕਟਾਂ ਦੀ ਸ਼ਿਕਸਤ ਦਿੰਦਿਆਂ ਲੜੀ ’ਚ ਲੀਡ ਬਣਾ ਲਈ ਸੀ। ਭਲਕੇ ਦਾ ਮੈਚ ਜਿੱਤ ਕੇ ਵਿਰਾਟ ਕੋਹਲੀ ਐਂਡ ਕੰਪਨੀ ਲੜੀ ਆਪਣੀ ਝੋਲੀ ਵਿੱਚ ਪਾਉਣਾ ਚਾਹੇਗੀ। ਭਾਰਤੀ ਟੀਮ ਟੀ-20 ਕ੍ਰਿਕਟ ਵਿੱਚ ਲਗਾਤਾਰ ਛੇਵੀਂ ਲੜੀ ਜਿੱਤਣ ਦੀਆਂ ਬਰੂਹਾਂ ’ਤੇ ਹੈ। ਇਸ ਸਿਲਸਿਲੇ ਦਾ ਆਗਾਜ਼ ਨਵੰਬਰ 2017 ਵਿੱਚ ਨਿਊਜ਼ੀਲੈਂਡ ਖ਼ਿਲਾਫ਼ ਘਰੇਲੂ ਲੜੀ ਵਿੱਚ ਜਿੱਤ ਨਾਲ ਹੋਇਆ ਸੀ। ਉਸ ਮਗਰੋਂ ਭਾਰਤ ਨੇ ਇਕ ਵੀ ਦੁਵੱਲੀ ਟੀ-20 ਲੜੀ ਨਹੀਂ ਗੁਆਈ। ਭਾਰਤ ਜੇਕਰ ਲੜੀ ਨੂੰ 2-0 ਨਾਲ ਜਿੱਤਦਾ ਹੈ ਤਾਂ ਆਈਸੀਸੀ ਦਰਜਾਬੰਦੀ ਵਿੱਚ ਦੂਜੇ ਸਥਾਨ ’ਤੇ ਕਾਬਜ਼ ਆਸਟਰੇਲੀਆ ਨਾਲ ਫ਼ਾਸਲਾ ਥੋੜ੍ਹਾ ਘੱਟ ਜਾਵੇਗਾ। ਪਰ 3-0 ਦੀ ਜਿੱਤ ਨਾਲ ਉਸ ਨੂੰ ਪਾਕਿਸਤਾਨ ਮਗਰੋਂ ਦੂਜਾ ਸਥਾਨ ਮਿਲੇਗਾ। ਦੂਜੇ ਪਾਸੇ ਭਾਰਤ ਨੂੰ ਅਜਿਹਾ ਕਰਨ ਤੋਂ ਰੋਕਣ ਲਈ ਆਸਟਰੇਲੀਆ ਨੂੰ ਜ਼ਿੰਬਾਬਵੇ ਵਿੱਚ ਚੱਲ ਰਹੀ ਮੌਜੂਦਾ ਤਿਕੋਣੀ ਲੜੀ ਦੇ ਅਗਲੇ ਦੋ ਮੈਚਾਂ ’ਚ ਜਿੱਤ ਦਰਜ ਕਰਨੀ ਹੋਵੇਗੀ।