ਆਸਟਰੇਲੀਆ ਖ਼ਿਲਾਫ਼ ਭਾਰਤੀ ਮਹਿਲਾ ਟੀਮ ਦਾ ਪਹਿਲਾ ਟੈਸਟ ਮੈਚ ਅੱਜ

ਇੰਗਲੈਂਡ ਨੂੰ ਹਰਾਉਣ ਮਗਰੋਂ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਭਲਕ ਤੋਂ ਆਸਟਰੇਲੀਆ ਖ਼ਿਲਾਫ਼ ਸ਼ੁਰੂ ਹੋ ਰਹੇ ਇਕਲੌਤੇ ਟੈਸਟ ਵਿੱਚ ਆਸਟਰੇਲੀਆ ਵਰਗੀ ਮਜ਼ਬੂਤ ਟੀਮ ’ਤੇ ਜਿੱਤ ਦਰਜ ਕਰਕੇ ਆਪਣੀਆਂ ਪ੍ਰਾਪਤੀਆਂ ’ਚ ਵਾਧਾ ਕਰਨਾ ਚਾਹੇਗੀ। ਭਾਰਤ ਨੇ 46 ਸਾਲਾਂ ਵਿੱਚ ਆਸਟਰੇਲੀਆ ਖ਼ਿਲਾਫ਼ ਖੇਡੇ ਗਏ ਦਸ ਟੈਸਟ ਵਿੱਚੋਂ ਇੱਕ ਵੀ ਨਹੀਂ ਜਿੱਤਿਆ ਹੈ। ਹਰਮਨਪ੍ਰੀਤ ਕੌਰ ਦੀ ਕਪਤਾਨੀ ਵਾਲੀ ਟੀਮ ਨੂੰ ਪਤਾ ਹੈ ਕਿ ਸਪਿੰਨਰ ਪੱਖੀ ਪਿੱਚ ਦਾ ਲਾਹਾ ਲੈਣ ਲਈ ਉਸ ਕੋਲ ਇਸ ਤੋਂ ਬਿਹਤਰ ਮੌਕਾ ਨਹੀਂ ਹੋ ਸਕਦਾ। ਭਾਰਤੀ ਗੇਂਦਬਾਜ਼ਾਂ ਖਾਸ ਕਰਕੇ ਆਫ ਸਪਿੰਨਰ ਦੀਪਤੀ ਸ਼ਰਮਾ ਨੇ ਪਿਛਲੇ ਹਫ਼ਤੇ ਡੀਵਾਈ ਪਾਟਿਲ ਸਟੇਡੀਅਮ ’ਤੇ ਇੰਗਲੈਂਡ ਖ਼ਿਲਾਫ਼ 347 ਦੌੜਾਂ ਨਾਲ ਮਿਲੀ ਜਿੱਤ ’ਚ ਅਹਿਮ ਭੂਮਿਕਾ ਨਿਭਾਈ ਸੀ। ਹੁਣ ਦੀਪਤੀ ਆਸਟਰੇਲੀਆ ਖ਼ਿਲਾਫ਼ ਵੀ ਇਸ ਪ੍ਰਦਰਸ਼ਨ ਨੂੰ ਦੁਹਰਾਉਣਾ ਚਾਹੇਗੀ। ਤੇਜ਼ ਗੇਂਦਬਾਜ਼ ਰੇਣੂਕਾ ਸਿੰਘ ਠਾਕੁਰ ਨੇ ਵੀ ਨਵੀਂ ਗੇਂਦ ਨਾਲ ਚੰਗਾ ਪ੍ਰਦਰਸ਼ਨ ਕੀਤਾ ਸੀ। ਤੇਜ਼ ਗੇਂਦਬਾਜ਼ ਪੂਜਾ ਵਸਤਰਾਕਰ ਨੇ ਵੀ ਇੰਗਲੈਂਡ ਖ਼ਿਲਾਫ਼ ਤਿੰਨ ਵਿਕਟਾਂ ਲਈਆਂ। ਬੱਲੇਬਾਜ਼ੀ ਵਿੱਚ ਇੰਗਲੈਂਡ ਖ਼ਿਲਾਫ਼ ਹਰਮਨਪ੍ਰੀਤ ਕੌਰ ਨੇ 49 ਅਤੇ ਨਾਬਾਦ 44 ਦੌੜਾਂ, ਜੈਮੀਮਾ ਰੌਡਰਿਗਜ਼ ਨੇ 68 ਅਤੇ ਯਾਸਤਿਕਾ ਭਾਟੀਆ ਨੇ 66 ਦੌੜਾਂ ਬਣਾ ਕੇ ਸਭ ਨੂੰ ਪ੍ਰਭਾਵਿਤ ਕੀਤਾ ਸੀ। ਸਲਾਮੀ ਬੱਲੇਬਾਜ਼ ਸਮ੍ਰਿਤੀ ਮੰਧਾਨਾ ਤੋਂ ਭਾਰਤ ਨੂੰ ਵੱਡੀ ਪਾਰੀ ਦੀ ਉਮੀਦ ਹੋਵੇਗੀ। ਪੂਜਾ ਪੂਨੀਆ ਕਵਰ ਵਜੋਂ ਭਾਰਤੀ ਟੀਮ ਨਾਲ ਜੁੜੀ ਹੈ ਪਰ ਹਰਲੀਨ ਦਿਓਲ ਨੂੰ ਮੌਕਾ ਮਿਲ ਸਕਦਾ ਹੈ, ਜਿਸ ਨੇ ਨੈੱਟ ’ਤੇ ਕਾਫ਼ੀ ਦੇਰ ਅਭਿਆਸ ਕੀਤਾ। ਕਰੀਬ 40 ਸਾਲ ਬਾਅਦ ਭਾਰਤ ਵਿੱਚ ਟੈਸਟ ਕ੍ਰਿਕਟ ਖੇਡਣ ਆਈ ਆਸਟਰੇਲਿਆਈ ਟੀਮ ਕੋਲ ਅਲੀਸਾ ਹੀਲੀ ਨਵੀਂ ਕਪਤਾਨ ਹੈ। ਮੈਗ ਲਾਨਿੰਗ ਦੀ ਥਾਂ ਕਪਤਾਨ ਬਣੀ ਹੀਲੀ ਲਈ ਭਾਰਤ ਵਿੱਚ ਟੈਸਟ ਜਿੱਤਣਾ ਵੱਡੀ ਚੁਣੌਤੀ ਹੋਵੇਗਾ।