IND vs WI ਪਹਿਲਾ ਟੈਸਟ – ਦੂਜੇ ਦਿਨ ਵੀ ਰਿਹਾ ਭਾਰਤ ਦਾ ਜਲਵਾ

ਰਾਜਕੋਟ – ਦੂਜੇ ਦਿਨ ਦਾ ਖੇਡ ਖਤਮ ਹੋਣ ਤੱਕ ਵਿੰਡੀਜ਼ ਨੇ 6 ਵਿਕਟਾਂ ਦੇ ਨੁਕਸਾਨ ‘ਤੇ 94 ਦੌੜਾਂ ਬਣਾਈਆਂ। ਇਸੇ ਦੇ ਨਾਲ ਭਾਰਤ 556 ਦੌੜਾਂ ਨਾਲ ਅੱਗੇ ਹੈ। ਭਾਰਤ ਦੀ ਪਹਿਲੀ ਪਾਰੀ ਦੇ ਵਿਸ਼ਾਲ ਸਕੋਰ ਦੇ ਜਵਾਬ ‘ਚ ਵਿੰਡੀਜ਼ ਦੀ ਟੀਮ ਸ਼ੁਰੂਆਤੀ ਓਵਰਾਂ ‘ਚ ਹੀ ਡਗਮਗਾ ਗਈ। ਤੇਜ਼ ਗੇਂਦਬਾਜ਼ ਮੁਹੰਮਦ ਸ਼ੰਮੀ ਨੇ ਮੈਚ ਦੇ ਤੀਜੇ ਅਤੇ ਪੰਜਵੇਂ ਓਵਰ ‘ਚ ਵਿੰਡੀਜ਼ ਦੀ ਓਪਨਿੰਗ ਜੋੜੀ ਨੂੰ ਪਵੇਲੀਅਨ ਭੇਜ ਦਿੱਤਾ। ਕ੍ਰੇਗ ਬ੍ਰੈਥਵੇਟ 2 ਅਤੇ ਕੀਰੋਨ ਪਾਲ 1 ਦੌੜ ਬਣਾ ਕੇ ਆਊਟ ਹੋਏ। ਇਸ ਤੋਂ ਬਾਅਦ ਸਪਿਨ ਰਵੀਚੰਦਰਨ ਅਸ਼ਵਿਨ ਨੇ ਸ਼ਾਈ ਹੋਪ (10) ਨੂੰ ਬੋਲਡ ਕਰਕੇ ਭਾਰਤ ਨੂੰ ਤੀਜੀ ਸਫਲਤਾ ਦਿਵਾਈ। ਚੌਥੀ ਸਫਲਤਾ ਭਾਰਤ ਨੂੰ ਸ਼ਿਮਰਾਨ ਹੈਡਮਾਇਰ (10) ਦੇ ਰੂਪ ‘ਚ ਮਿਲੀ ਜੋ ਰਨ ਆਊਟ ਹੋਏ। ਸੁਨੀਲ ਅੰਬਰੀਸ਼ ਵੀ ਸਸਤੇ ‘ਚ ਆਊਟ ਹੋ ਗਏ। ਅੰਬਰੀਸ਼ 12 ਦੌੜਾਂ ਦੇ ਨਿੱਜੀ ਸਕੋਰ ਦੇ ਆਊਟ ਹੋਏ। ਇਸ ਤੋਂ ਪਹਿਲਾਂ ਭਾਰਤੀ ਕ੍ਰਿਕਟ ਟੀਮ ਨੇ ਵਿੰਡੀਜ਼ ਦੇ ਖਿਲਾਫ ਪਹਿਲੇ ਟੈਸਟ ਮੈਚ ਦੀ ਪਹਿਲੀ ਪਾਰੀ 9 ਵਿਕਟਾਂ ‘ਤੇ 649 ਦੌੜਾਂ ‘ਤੇ ਘੋਸ਼ਿਤ ਕੀਤੀ। ਭਾਰਤ ਵੱਲੋਂ 3 ਬੱਲੇਬਾਜ਼ਾਂ ਨੇ ਸੈਂਕੜੇ ਲਗਾਏ। ਓਪਨਰ ਪ੍ਰਿਥਵੀ ਸ਼ਾ ਨੇ 134, ਕਪਤਾਨ ਵਿਰਾਟ ਕੋਹਲੀ ਨੇ 139 ਅਤੇ ਆਲਰਾਊਂਡਰ ਰਵਿੰਦਰ ਜਡੇਜਾ ਨੇ ਅਜੇਤੂ 100 ਦੌੜਾਂ ਦੀ ਪਾਰੀ ਖੇਡੀ। ਹਾਲਾਂਕਿ ਰਿਸ਼ਭ ਪੰਤ ਅਤੇ ਚੇਤੇਸ਼ਵਰ ਪੁਜਾਰਾ ਸੈਂਕੜਾ ਲਗਾਉਣ ਤੋਂ ਖੰਝੇ ਗਏ। ਪੰਤ 92 ਅਤੇ ਪੁਜਾਰਾ 86 ਦੌੜਾਂ ਬਣਾ ਕੇ ਆਊਟ ਹੋਏ। ਵਿੰਡੀਜ਼ ਲਈ ਗੇਂਦਬਾਜ਼ੀ ‘ਚ ਦਵਿੰਦਰ ਵਿਸ਼ੂ ਨੇ ਸਭ ਤੋਂ ਜ਼ਿਆਦਾ 4 ਵਿਕਟਾਂ ਲਈਆਂ। ਸ਼ੇਰਮੇਨ ਲੁਈਸ ਨੇ 2, ਜਦਕਿ ਕ੍ਰੇਗ ਬ੍ਰੈਥਵੇਟ, ਰੋਸਟਨ ਚੇਸ ਅਤੇ ਸ਼ੈਨਨ ਗੈਬ੍ਰੀਅਲ ਨੇ 1-1 ਵਿਕਟ ਲਿਆ।