ਅਯੁੱਧਿਆ ਹਵਾਈ ਅੱਡੇ ਦਾ ਨਾਂ ਮਹਾਰਿਸ਼ੀ ਵਾਲਮੀਕ ਦੇ ਨਾਮ ’ਤੇ ਰੱਖਣ ਨੂੰ ਮਨਜ਼ੂਰੀ

ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਹੇਠ ਹੋਈ ਕੈਬਨਿਟ ਮੀਟਿੰਗ ਦੌਰਾਨ ਅਯੁੱਧਿਆ ਹਵਾਈ ਅੱਡੇ ਦਾ ਨਾਂ ‘ਮਹਾਰਿਸ਼ੀ ਵਾਲਮੀਕ ਕੌਮਾਂਤਰੀ ਹਵਾਈ ਅੱਡਾ, ਅਯੁੱਧਿਆਧਾਮ’ ਰੱਖਣ ਦੀ ਤਜਵੀਜ਼ ਨੂੰ ਅੱਜ ਪ੍ਰਵਾਨਗੀ ਦੇ ਦਿੱਤੀ ਗਈ। ਮੀਟਿੰਗ ਦੌਰਾਨ ਹਵਾਈ ਅੱਡੇ ਨੂੰ ਕੌਮਾਂਤਰੀ ਏਅਰਪੋਰਟ ਐਲਾਨਣ ਦਾ ਫ਼ੈਸਲਾ ਵੀ ਲਿਆ ਗਿਆ। ਮੋਦੀ ਨੇ 30 ਦਸੰਬਰ ਨੂੰ ਇਸ ਹਵਾਈ ਅੱਡੇ ਦਾ ਉਦਘਾਟਨ ਕੀਤਾ ਸੀ। ਪ੍ਰਧਾਨ ਮੰਤਰੀ ਨੇ ‘ਐਕਸ’ ’ਤੇ ਕਿਹਾ ਕਿ ਸਰਕਾਰ ਪਾਵਨ ਨਗਰੀ ਅਯੁੱਧਿਆ ਨੂੰ ਵਿਸ਼ਵ ਭਰ ਨਾਲ ਜੋੜਨ ਲਈ ਵਚਨਬੱਧ ਹੈ। ਸ਼ਹਿਰੀ ਹਵਾਬਾਜ਼ੀ ਮੰਤਰੀ ਜਯੋਤਿਰਾਦਿੱਤਿਆ ਸਿੰਧੀਆ ਨੇ ਕਿਹਾ ਕਿ ਅਯੁੱਧਿਆ ਹਵਾਈ ਅੱਡੇ ਨੂੰ ਕੌਮਾਂਤਰੀ ਏਅਰਪੋਰਟ ਦਾ ਦਰਜਾ ਦੇਣ ਨਾਲ ਇਲਾਕੇ ਦਾ ਆਰਥਿਕ ਵਿਕਾਸ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਵਿਦੇਸ਼ੀ ਸ਼ਰਧਾਲੂ ਅਤੇ ਸੈਲਾਨੀ ਵੱਡੀ ਗਿਣਤੀ ’ਚ ਆਉਣਗੇ ਜਿਸ ਨਾਲ ਅਯੁੱਧਿਆ ਦੀ ਆਲਮੀ ਤੀਰਥ ਅਸਥਾਨ ਵਜੋਂ ਅਹਿਮੀਅਤ ਵਧੇਗੀ। ਕੈਬਨਿਟ ਮੀਟਿੰਗ ਦੌਰਾਨ ਹੀ ਸਾਲ 2021 ਤੋਂ ਪੰਜ ਸਾਲਾਂ ’ਚ 4797 ਕਰੋੜ ਰੁਪਏ ਦੀ ਲਾਗਤ ਨਾਲ ਜਾਰੀ ਪ੍ਰਿਥਵੀ ਵਿਗਿਆਨ ਨਾਲ ਸਬੰਧਤ ਪੰਜ ਉਪ ਯੋਜਨਾਵਾਂ ਵਾਲੀ ਇਕ ਵਿਆਪਕ ਪਹਿਲ ‘ਪ੍ਰਿਥਵੀ ਵਿਗਿਆਨ’ ਨੂੰ ਵੀ ਮਨਜ਼ੂਰੀ ਦਿੱਤੀ ਗਈ। ਇਕ ਸਰਕਾਰੀ ਬਿਆਨ ’ਚ ਕਿਹਾ ਗਿਆ ਕਿ ਪ੍ਰਿਥਵੀ ਵਿਗਿਆਨ ਖੋਜ ਅਤੇ ਨਵੇਂ ਪ੍ਰੋਗਰਾਮਾਂ ਦੇ ਵਿਕਾਸ ਨੂੰ ਸਮਰੱਥ ਬਣਾਏਗਾ। ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ ਕਿ ਪ੍ਰਿਥਵੀ ਵਿਗਿਆਨ ’ਚ ਇਹ ਵੱਡੀ ਪੁਲਾਂਘ ਹੈ ਅਤੇ ਇਹ ਨਾਜ਼ੁਕ ਖੇਤਰਾਂ ਜਲਵਾਯੂ ਖੋਜ, ਸਮੁੰਦਰੀ ਸੇਵਾਵਾਂ, ਧਰੁਵੀ ਵਿਗਿਆਨ, ਭੂਚਾਲ ਵਿਗਿਆਨ ਅਤੇ ਹੋਰਾਂ ਨੂੰ ਕਵਰ ਕਰਦਾ ਹੈ।